Ауа-райының жылынуына байланысты Атырау қаласында мопед, скутер, самокат және велосипед секілді көлік құралдарын пайдаланатын азаматтардың саны айтарлықтай артты. Әсіресе, жасөспірімдер арасында мотокөлік құралдарын басқару жиілеп, бұл жол қозғалысы қауіпсіздігіне ерекше назар аударуды қажет етеді.
Осыған байланысты Атырау қаласы полиция басқармасының патрульдік полиция батальонының қызметкерлері таксопарктер, қоғамдық көлік, мотокөлік жүргізушілері мен тұрғындар арасында түсіндіру жұмыстарын жүргізді. Тәртіп сақшылары мотокөлік құралдары жоғары қауіпті көлік санатына жататынын ескертіп, жол-көлік оқиғаларының алдын алу үшін жол қозғалысы ережелерін қатаң сақтау қажеттігін түсіндірді.
Полиция қызметкерлері азаматтарды жылдамдықты асырмауға, қауіпсіздік шараларын сақтауға және жол қозғалысына жауапкершілікпен қарауға шақырады.
