Облыста ауа райының күрт нашарлап, көп мөлшерде жаңбырдың жаууына байланысты көшелер суға лық толды. Жергілікті атқарушы органға көмек ретінде облыстық төтенше жағдайлар департаментінің күш-құралдары жиналған суды сору бойынша апаттық-құтқару жұмыстарын күшейтті.

Департаменттің қоғаммен байланыс тобының хабарлауынша, бүгін сағат 05:40-тан бастап Атырау қаласы «Сарқамыс» шағынауданы Т.Садықов көшесінің бойында 2772 текше метр су сорылды. Сағат 10:15-те «Жұлдыз – І» шағынауданындағы Мөде қаған көшесінен 2 текше метр су тасымалданды. Сондай-ақ сағат 12:10-нан бастап Томарлы ауылының Шалхаров көшесінде жұмыс қарқын алды. Сағат 13:55-тен бастап Сарықамыс-ІІ, №13 көшедегі тұрғын үйдің ауласына жиналған су шығарылса, сағат 14:55-тен бастап «Мирас» шағынауданы Астана көшесіндегі «Алаш» балабақшасының ауласы құрғатылды.

Айта кету керек, апаттық-құтқару жұмыстарына аталған департаменттің өрт сөндіру қызметінің 17 қызметкері және 2 бірлік техника мен 4 дана мотопомпа жұмылдырылды.

А.НӘСІПҚАЛИҚЫЗЫ