Атырауда жыл сайынғы "Atyrau Energy Challenge" байқауы басталады, жергілікті жастар IT саласындағы бизнес-идеяларын ұсыну мүмкіндігін иеленіп отыр, деп хабарлайды Атырау облысының өңірлік коммуникациялар қызметі.

Ең үздік стартап-жоба үшін ұйымдастырушылар "Atyrauhub" қоры мен "Ayacom" компаниясы атынан 1 миллион теңге қаржылай сыйлық береді. "Atyrau Energy Challenge" -мұнай-газ саласындағы операциялық процестерді басқаруға ықпал ететін жаңа идеялардың пайда болуы мен дамуын ынталандыратын бағдарламашылар, әзірлеушілер, веб-шеберлер марафоны.

Ұйымдастырушылардың айтуынша, іс-шара барысында қатысушылар мұнай-газ секторының жаттықтырушыларымен сөйлесуге мүмкіндік алады, олар балалардың идеяларын жүзеге асыруға көмектеседі. Сонымен қатар, жетекші мұнай-газ компанияларының өкілдерімен кездесулер ұйымдастырылады. Конкурсқа қатысуға өтінімдер 14 қарашаға дейін қабылданады. Байқауға қатысу үшін "Atyrauhub" қорының сайтында тіркеліп, сауалнаманы толтыру қажет.