Атырауда Махамбет атындағы академиялық қазақ драма театрында екінші театрішілік фестиваль ұйымдастырылады, деп хабарлайды AtyrauPress тілшісі.
Бағдарламаға 2025 жылы сахналанған қойылымдар енгізілген. Олардың қатарында репертуардағы спектакльдер, сондай-ақ театр труппасының эксперименттік бағыттағы жұмыстары да бар.
Фестивальдің басты ерекшелігі — қойылымдарға сарапшылар мен театр сыншыларының шақырылуы. Олар шығармашылық ұжым жұмысын кәсіби тұрғыда бағалап, бағыт-бағдар бермек.
Театр директоры Сағынтай Көпжасаровтың айтуынша, мұндай фестивальдер актерлердің кәсіби деңгейін арттырып, театрдың шығармашылық дамуына серпін береді.
– Мұндай фестивальдер тәжірибе алмасуға және мамандар тарапынан әділ баға алуға мүмкіндік береді. Бұл бізге өзіміздің басым тұсымызды айқындап, жетілдіруді қажет ететін бағыттарды анықтауға көмектеседі, – деді ол.
Айта кетейік, 2025 жылы театр репертуарлық және премьералық қойылымдарды қоса алғанда шамамен 80 спектакльді көрермен назарына ұсынды. Театр тарихында отандық және шетелдік драматургия негізінде 400-ге жуық қойылым сахналанған. Олардың арасында тарихи тақырыптағы және классикалық шығармалар да бар.
