«Вакцина алыңыз – өзіңізді және жақындарыңызды қорғаңыз!».
Осындай атаумен Махамбет ауданының әкімдігі «Caspian Logistic and procurement» компаниясымен бірлесіп, әлеуметтік аз қамтылған отбасыларды қолдау және вакцина алғандарды ынталандыру мақсатында акция ұйымдастыруда. Компания тарапынан сатып алынған премиум санаттағы белсенді биологиялық қоспа 1000 отбасыға тегін таратылады. Өткен аптаның жұма, сенбі күндері ұйымдастырылған қайырымдылық акциясы кезінде Махамбет ауданы бойынша 600-ден астам отбасы қамтылды.
- Пандемия кезінде халықтың денсаулығын қорғап, иммундық жүйені көтерген дұрыс әрине. Ал вакцина – вирустың таралуын төмендетуге, ұжымдық иммунитетті қалыптастыруға сеп болмақ. Әлі де вирус жұқтырғандар азаймай отыр. Сондықтан осындай қиын кезде бір-бірімізді қолдау маңызды. Мұндай акциялар әлбетте, жалғасын табады. Бастамаға қолдау білдірген Махамбет ауданының әкімі Ринат Бауыржанұлына рахмет,- деді компания директоры Айгүл Қалиева.
Айта кетейік, шараға компания өкілдерінен бөлек «Жүректен жүрекке» қоғамдық қоры еріктілері, Махамбет аудандық жастар ресурстық орталығы мен аудан еріктілері атсалысты. Осындай қиын кезеңде көмек көрсеткен жомарт жандарға ауыл тұрғындары дән риза.
Қ.АЙТҚАЛИЕВ
