Жаз – балалар үшін ең керемет мезгіл. Демалыс, ойын, серуен, шомылу — бәрі де балалық шақтың ең жарқын естеліктеріне айналады. Алайда дәл осы кезеңде қауіп-қатер де күшейе түсетіні белгілі. Ашық су айдындары, көлік жолдары, ыстық күн, жалғыз серуендеу сынды факторлар – бала өмірі мен денсаулығына нақты қауіп төндіруі мүмкін.
Осы орайда, бала қауіпсіздігі – тек балабақша мен мектептің ғана емес, ең алдымен ата-ананың басты назарында болуы керек. Өкінішке қарай, жазғы мезгілде орын алатын төтенше жағдайлардың көбі — ересектердің салғырттығынан, бейқамдықтан туындайды.
Бала – айналып келгенде қоғамның ең қорғансыз мүшесі. Оны қауіптен сақтайтын — тек үлкендердің қырағылығы мен қамқорлығы. Сондықтан ата-аналарға төмендегідей маңызды кеңестерді естен шығармаған жөн:
- Баланы бақылаусыз қалдырмаңыз. Қайда жүргенін, не істеп жатқанын жиі сұрап отырыңыз.
- Суға барғанда міндетті түрде ересек адам бірге болсын. Қалқыма кеудешелер мен арнайы шомылу орындарын таңдаңыз.
- Жолда жүру ережесін балаңызға үйретіңіз. Әсіресе велосипед, самокат сияқты көлік құралдарын пайдаланатын балалар үшін бұл өте маңызды.
- Бейтаныс адамдармен сөйлеспеуді ескертіңіз.
- Қауіпсіздік нөмірлерін (101, 102, 103) жаттатқызыңыз.
Жаз – тек қуаныш емес, сонымен қатар жауапкершілік кезеңі. Ата-ана баласының жаны мен тәніне жауапты екенін ұмытпауы тиіс.
Бір сәттік абайсыздық – орны толмас қайғыға әкелуі мүмкін. Сондықтан әр баланың жазғы демалысы қауіпсіз әрі қуанышты болуы үшін барлық қажетті шаралар дер кезінде жасалуы қажет.
Қауіпсіз жаз – саналы ата-анадан басталады!
Махамбет аудандық полиция бөлімінің
Жергілікті полиция қызмет бөлімшесінің
кәмелеттік жасқа толмағандар істері жөніндегі
аға учаскелік полиция инспекторы
полиция майоры Елешова Ақбөбек
