Аудандық «Өнерпаз» мәдениет үйінде Махамбет аудандық электр жүйесі мекемесінің құрылғанына 55 жыл толуына орай «Жарты ғасырдан астам тарихымызбен мақтанамыз» атты мерекелік шара ұйымдастырылды.

Мекеменің арғы-бергі тарихы туралы лед экран арқылы жұртшылық назарына ұсынылған бейне көрсетілімде әр жылдардағы аудан энергетиктерінің елді мекендерді электрлендірудегі қажырлы еңбектері, аға буын өкілдерінің өмір соқпақтары, энергетика саласының қазіргі жетістіктері түгел қамтылған.

Қазіргі Махамбет аудандық электр жүйесі мекемесі, алғашында «Махамбет дизельді электр стансасы» болып құрылып, алғаш рет аудан орталығының тұрғындарына қызмет көрсете бастаған. Бар болғаны екі-ақ дизельді генератор арқылы аудан, ауыл тұрғындарын жарықпен қамтамасыз еткен. Мекеменің қаз басып қалыптасу кезеңдері туралы Махамбет аудандық электр жүйесі мекемесінің басшысы Д.Хайрушевтің баяндамасында жан-жақты айтылды.

Барша аудан энергетиктерін мерейлі мерекелерімен құттықтаған «Атырау-Жарық» АҚ –ның күрделі құрылыс жөніндегі тете президенті Б.Әліпов оннан астам сала ардагерлерін марапаттады. Сондай-ақ, М.Шыныбеков «Атырау-Жарық» АҚ-ның, ал К.Әбілтаева «АтырауЭнергоСату» АҚ-ның «Құрмет грамотасына» ие болды. Мерекеге орай аудан әкімінің алғыс хатын алып, көңілдері марқайып қалғандардың қарасы да оннан асып жығылады. Жалпы бұл күнді марапат жауған күн десе де болғандай.

Аудан өнерпаздары ән-күйден шашу шашып, мерекенің шырайын аша түсті.

Н.Тельман