Еліміздің батыс аймағында ежелден келе жатқан дәстүрлердің бірі – көрісу. Бұл күнді батыстық ағайындар асыға күтіп, ерекше атап өтеді.

Таң атысымен міндетті түрде бауырсақ пісіріп, ағайын-туыс, көрші-қолаңды ақ дастарқан жайып күтеді. Биыл 14 наурыз көрісу күнін махамбеттіктер ерекше көңіл-күймен қарсы алды. Олай дейтін себебіміз, орталық алаңға жиналған жұртшылық бір-бірімен құшақтасып көрісіп, аудан өнерпаздарының дайындаған концерттік бағдарламасына куә болды. Халқымыз дастарқанын қашанда айрықша қастерлеген. Орталық алаңнан табылған тұрғындар ризық-несібеміз мол болсын деген ниетте жайылған ақ дастарқандағы бауырсақ пен ағарғаннан ауыз тиіп, мәре-сәре болды.  Ел ағалары ақ тілектерін білдіріп, игі дәстүрді әрқашанда дәріптеуге шақырды.

Үлкенге құрмет, кішіге ізет көрсетуге, ренжіскен жандарды татуластыруға үндейтін көрісу күнінің тәрбиелік мәні жоғары.

Б.САПАРОВА.