Кейде үлкен өзгерістер ауқымды жобалардан емес, қарапайым әрекеттерден басталады. Жерге тасталмаған бір қоқыс, егілген бір тал көшет немесе тазаланған бір аула – қоршаған ортаға деген құрметтің көрінісі. Осы тұрғыдан алғанда, «Таза Қазақстан» бастамасы табиғатты қорғауға бағытталған шара ғана емес, қоғамның көзқарасын өзгертетін маңызды қозғалысқа айналып келеді.
Тазалық мәселесі тек коммуналдық қызметтердің міндеті деген түсініктен арылатын уақыт жетті. Өйткені қоршаған ортаның қандай болатыны әрқайсымыздың күнделікті іс-әрекетімізге байланысты. Ауласы таза тұрғын үй, күтімді саябақ, гүлденген көше – мұның бәрі тұрғындардың белсенділігі мен жанашырлығының нәтижесі. Өзіміз өмір сүріп жатқан ортаны таза ұстау арқылы біз балаларға үлгі көрсетіп, жауапкершілік мәдениетін қалыптастырамыз.
Табиғат – болашақ ұрпаққа аманат. Сондықтан оны қорғау мен аялау әр азаматтың азаматтық борышы болуы тиіс. Бүгінгі тазалыққа қосылған әрбір үлес ертеңгі көркейген елдің негізін қалайды. «Таза Қазақстан» бастамасының басты құндылығы да осында – ол адамдарды ортақ мақсатқа жұмылдырып, туған жерге деген сүйіспеншілікті нақты іспен дәлелдеуге үндейді.
Таза көше, таза аула, таза қала – мұның бәрі өздігінен пайда болмайды. Ол әр адамның жауапкершілігі мен жанашырлығынан қалыптасады. Сондықтан туған жердің көркеюін қаласақ, тазалықты өзгеден емес, өзімізден бастауымыз керек. Сонда ғана «Таза Қазақстан» идеясы өмір салтына айналып, келер ұрпаққа үлгі боларлық игі дәстүрге ұласады.
Г.СӘДУАҚАС
