Адамның туған жеріне деген сүйіспеншілігін сөзбен ғана емес, ісімен де көрсетуге болады. Меніңше, соның ең қарапайым мысалы – айналамызды таза ұстау. Өзіміз тұратын көшеге, аулаға, саябаққа немқұрайлы қарамау – туған жерге деген құрметтің бір белгісі.
«Таза Қазақстан» бастамасы осы түсінікті қалыптастыруға мүмкіндік беріп отыр. Аудан тұрғындарының бірге шығып, аулаларды тазалап, ағаш отырғызып, қоғамдық орындарды ретке келтіруі – жақсы дәстүр. Әсіресе әр жастағы адамдардың бір іске жұмылуы көңіл қуантады. Мұндай кезде тазалық жұмысының өзінен бөлек, адамдардың бір-біріне деген жауапкершілігі де арта түседі.
Мен үшін таза аудан дегеніміз – тек қоқысы жоқ жер емес. Ол – тұрғындары бір-бірінің еңбегін бағалайтын, ортақ дүниеге ұқыпты қарайтын, туған жерін қадірлейтін орта. Осындай түсінік қалыптасса, «Таза Қазақстан» жұмысы уақытша науқан болып қалмай, күнделікті өміріміздің бір бөлігіне айналады деп ойлаймын.
Г.ЖОЛДАСҚАЛИ
