Бүгінгі таңда табиғатты қорғау мен қоршаған ортаны таза ұстау – бүкіл қоғамның ортақ міндетіне айналды. Ел көлемінде жүзеге асып жатқан «Таза Қазақстан» бастамасы да осы маңызды мақсатты көздейді. Бұл тек сенбілік өткізу немесе көшені тазалау ғана емес, ол – халықтың экологиялық мәдениетін қалыптастыруға бағытталған үлкен қадам.
Тазалық – мәдениеттің белгісі. Адам өмір сүретін ортасының таза болуына мән берсе, оның денсаулығы да, көңіл-күйі де жақсы болады. Өкінішке қарай, кей жерлерде қоқысты бейберекет тастау, табиғатты ластау сияқты әрекеттер әлі де кездеседі. Мұндай немқұрайлық қоршаған ортаға үлкен зиян келтіреді. Табиғаттың ластануы ауа сапасының төмендеуіне, су көздерінің бүлінуіне және адам денсаулығына қауіп төндіреді.
«Таза Қазақстан» бағдарламасының басты мақсаты – әр азаматтың бойында табиғатқа деген жауапкершілікті ояту. Аула тазалау, ағаш отырғызу, өзен-көлдердің маңын қоқыстан тазарту сияқты жұмыстар қоғамға пайдалы іс қана емес, жастарға үлгі болатын тәрбиелік мәні бар шаралар. Әсіресе жас ұрпақ табиғатты қорғаудың маңызын ерте түсінсе, елдің болашағы да жарқын болмақ.
Тазалық тек сыртқы ортадан басталмайды. Ол – адамның ішкі мәдениеті мен тәрбиесінің көрінісі. Егер әр адам өз үйінің, ауласының, көшесінің тазалығына жауапкершілікпен қараса, еліміз де көркейе түседі. Бір адамның жасаған жақсы ісі өзгеге үлгі болады.
«Таза Қазақстан» – бір күндік науқан емес, ол – ұлттың болашағына бағытталған маңызды бастама. Табиғатты аялау – туған жерге деген құрмет. Сондықтан әрқайсымыз қоршаған ортаны таза ұстауға үлес қосуымыз керек. Таза елде – дені сау, саналы әрі бақытты ұрпақ өседі.
Г.СӘДУАҚАСОВА
