Қоршаған ортаның тазалығы – әр адамның мәдениеті мен санасының көрсеткіші. Бүгінде «Таза Қазақстан» бастамасы арқылы табиғатты қорғау, айналаны таза ұстау мәселесіне ерекше көңіл бөлінуде. Бұл тек сенбілікке шығып, қоқыс жинаумен шектелмейді. Табиғатты аялау – туған жерге деген құрметтің белгісі.
Қазіргі таңда экология мәселесі бүкіл әлемді алаңдатып отыр. Ауаның ластануы, қоқыстың көбеюі, жасыл желектің азаюы адам денсаулығына да кері әсерін тигізуде. Сондықтан табиғатты қорғау жұмыстары әр отбасыдан, әр азаматтан басталуы керек. Қоқысты кез келген жерге тастамау, ағаш отырғызу, суды үнемдеу – барлығы қоршаған ортаны сақтауға қосылған үлес.
Таза табиғат – болашақ ұрпаққа қалдыратын ең үлкен байлығымыз. Егер әр адам туған жерінің тазалығына жауапкершілікпен қараса, еліміз де көркейіп, экологиялық мәдениет қалыптасады. Табиғатты қорғау – бүгінгі күннің ғана емес, келешектің де маңызды міндеті.
