Табиғат – адамзаттың баға жетпес байлығы, өмірдің қайнар көзі. Оны қорғау – тек бүгінгі күннің емес, келешек ұрпақтың алдындағы үлкен жауапкершілік. Сондықтан қоршаған ортаға жанашырлықпен қарап, табиғи байлықтарды сақтау – әрбір азаматтың азаматтық парызы. Осы мақсатты жүзеге асыруда «Таза Қазақстан» экологиялық акциясының маңызы ерекше.
Бүгінде ауданымызда бұл бастама аясында табиғатты қорғауға бағытталған түрлі жұмыстар жүйелі түрде жүргізілуде. Елді мекендерді абаттандыру, өзен-көл жағалауларын тазарту, ағаш көшеттерін отырғызу, көгалдандыру және сенбіліктер ұйымдастыру – қоршаған ортаны сақтауға бағытталған нақты істердің бірі. Бұл жұмыстарға мекеме қызметкерлері, жастар, еріктілер және аудан тұрғындары белсенді қатысып, туған өлкенің табиғатын көркейтуге өз үлестерін қосып келеді.
Табиғатты қорғау – тек ағаш отырғызумен немесе қоқыс жинаумен шектелмейді. Ол табиғи байлықты ұқыпты пайдалану, су көздерін ластамау, жасыл желекті күтіп-баптау және қоршаған ортаға зиян келтірмеу сияқты күнделікті әрекеттерден басталады. Осындай қарапайым қағидаларды әркім өмірлік ұстанымына айналдырса, табиғаттың байлығы сақталып, экологиялық мәдениет те нығая түседі.
«Таза Қазақстан» – туған жерге деген сүйіспеншілікті нақты іспен дәлелдеуге үндейтін маңызды бастама. Табиғатқа жанашырлық танытып, қоршаған ортаны қорғауға әрқайсымыз үлес қосқанда ғана ауданымыздың табиғаты көркейіп, келер ұрпаққа таза әрі жасыл өлке аманат етіледі. Табиғатты қорғау – бүгінгі міндет қана емес, болашақ алдындағы қасиетті борыш.
