Сыбайлас жемқорлық – кез келген мемлекеттің дамуына кері әсер ететін, қоғамның сеніміне сызат түсіретін келеңсіз құбылыс. Ол тек заң бұзушылық қана емес, әділдік пен теңдік қағидаттарына қайшы келетін әрекет. Сондықтан жемқорлыққа қарсы күрес тек құзырлы органдардың емес, барша қоғамның ортақ ісіне айналуы тиіс.
Жемқорлықтың алдын алу ең алдымен әр адамның адалдықты өмірлік ұстанымына айналдыруынан басталады. Заңды құрметтеу, өз міндетіне жауапкершілікпен қарау және әділ шешім қабылдау – қоғамдағы сенімді нығайтатын басты құндылықтар. Әсіресе жас ұрпақтың бойына адал еңбек пен әділдікті дәріптеу – болашақтың берік негізін қалыптастырады.
Бүгінде елімізде ашықтық пен әділдік қағидаттарын нығайту бағытында жүйелі жұмыстар жүргізіліп келеді. Мемлекет тарапынан қабылданып жатқан бастамалар азаматтардың құқықтарын қорғауға, мемлекеттік қызметтің ашықтығын арттыруға және қоғамда сыбайлас жемқорлыққа мүлдем төзбеушілік мәдениетін қалыптастыруға бағытталған. Мұндай жұмыстардың нәтижелі болуы әр азаматтың белсенді ұстанымына да байланысты.
Таза қоғам – адал азаматтардан құралады. Сондықтан әрқайсымыз заңды сыйлап, әділдікті қолдап, жемқорлыққа бейжай қарамайтын ұстаным қалыптастырсақ, келер ұрпаққа сенім мен жауапкершілікке негізделген қоғамды мұра ете аламыз.
