Отбасы – әр адамның өміріндегі ең қымбат құндылық, сүйіспеншілік пен өзара құрметтің мекені. Алайда кейбір отбасыларда кездесетін зорлық-зомбылық осы қасиетті ортаның берекесін кетіріп, адамдардың өміріне ауыр зардап әкеледі. Сондықтан отбасылық зорлық-зомбылыққа жол бермеу – тек жеке отбасының емес, бүкіл қоғамның маңызды міндеті. Заң мен тәртіптің басты мақсаты да – әр адамның құқығы мен қауіпсіздігін қорғау.
Зорлық-зомбылық тек дене жарақатын салумен шектелмейді. Қорлау, қорқыту, психологиялық қысым көрсету немесе экономикалық тәуелділікке мәжбүрлеу де адамның қадір-қасиетіне нұқсан келтіретін әрекеттер болып саналады. Мұндай жағдайды «отбасылық мәселе» деп елемеу дұрыс емес. Керісінше, заң талаптарын сақтап, жәбірленушіге қолдау көрсету – азаматтық жауапкершіліктің белгісі. Қоғамда заң мен тәртіп орныққан сайын адамдар өз құқықтарының қорғалатынына сенім артып, зорлық-зомбылықтың алдын алу мүмкіндігі артады.
Мықты қоғам ең алдымен мықты отбасынан басталады. Ал мықты отбасы қорқынышпен емес, сыйластықпен, түсіністікпен және сеніммен қалыптасады. Сондықтан әрбір азамат заңды құрметтеп, зорлық-зомбылықтың кез келген түріне бейжай қарамауы тиіс. Заң мен тәртіпті сақтау арқылы ғана біз балалар қауіпсіз өсетін, әр адамның құқығы қорғалатын және өзара құрмет үстемдік ететін қоғам қалыптастыра аламыз.
