Өз құқығын білмейтін адам түрлі жағдайларда қиындыққа тап болуы мүмкін. Сондықтан құқықтық сауаттылықты арттыру – қазіргі қоғам үшін маңызды міндеттердің бірі. Әр азамат өзінің қандай құқықтары бар екенін ғана емес, қандай міндеттерді орындауы керектігін де білуі тиіс.
Бұл мәселе әсіресе жастар үшін маңызды. Мектеп қабырғасынан бастап заңды құрметтеуді, өзгенің құқығына қол сұқпауды және жауапкершіліктің мәнін түсіндіру қажет. Интернеттегі қауіпсіздік, буллинг, алаяқтық сияқты мәселелер де құқықтық білімді қажет етеді. Қарапайым заң талаптарын білу кей жағдайда үлкен мәселенің алдын алуға мүмкіндік береді.
Құқықтық сауатты азамат өз әрекетінің салдарын түсінеді және шешім қабылдағанда жауапкершілікті сезінеді. Сондықтан заңды білу – тек мамандарға қажет білім емес. Құқығын білетін, міндетін орындайтын азаматтар көбейген сайын қоғам да қауіпсіз әрі тұрақты бола түседі.
Г.СӘДУАҚАС
