Қоғамның дамуы мен елдің ертеңі ең алдымен дені сау, білімді әрі саналы ұрпаққа байланысты. Алайда бүгінде жастардың болашағына қауіп төндіретін өзекті мәселелердің бірі – есірткі қолдану мен оның заңсыз айналымы. Бұл тек жеке адамның денсаулығына зиян келтіретін әдет қана емес, тұтас отбасы мен қоғамға зардабын тигізетін күрделі мәселе.
Есірткінің әсері адам өмірін біртіндеп құрдымға жетелейді. Ол денсаулықты әлсіретіп қана қоймай, адамның ойлау қабілетіне, мінез-құлқына және өмірлік мақсаттарына кері ықпал етеді. Өкінішке қарай, жеңіл қызығушылықпен басталған әрекет көп жағдайда тәуелділікке ұласып, адамның өмір жолын түбегейлі өзгертіп жатады. Сондықтан жастар арасында салауатты өмір салтын насихаттау, олардың бос уақытын тиімді ұйымдастыру және зиянды әдеттердің салдарын түсіндіру аса маңызды.
Есірткімен күрес тек құқық қорғау органдарының ғана емес, бүкіл қоғамның ортақ міндеті. Ата-ана, ұстаз, қоғам белсенділері мен әрбір азамат бұл мәселеге бейжай қарамауы тиіс. Болашақ ұрпақтың дені сау, санасы сергек болып өсуі үшін есірткіге қарсы күресті күшейтіп, өмірдің құндылығын дәріптеуіміз қажет. Өйткені есірткіден бас тарту – өз өміріңді, отбасыңды және болашағыңды таңдаумен тең.
