Қоғамның дамуына кедергі келтіретін мәселелердің бірі – сыбайлас жемқорлық. Оның салдары белгілі бір мекеменің немесе жеке адамның мәселесімен ғана шектелмейді. Жемқорлық қоғамдық сенімге әсер етіп, заң мен әділдік қағидаттарының әлсіреуіне әкелуі мүмкін.
Сондықтан сыбайлас жемқорлықтың алдын алу жұмысы тек құқық бұзушылық орын алғаннан кейін шара қолданумен шектелмеуі керек. Ең маңызды бағыттардың бірі – оның пайда болуына жол бермейтін орта қалыптастыру.
Ауданда бұл бағытта құқықтық түсіндіру жұмыстарының маңызы зор. Мемлекеттік қызметшілер мен мекеме қызметкерлерінің заң талаптарын сақтауы, азаматтардың құқықтары мен міндеттерін білуі, мемлекеттік қызмет көрсету кезінде ашықтық пен заңдылықтың қамтамасыз етілуі – сыбайлас жемқорлық тәуекелдерін азайтудың маңызды шарттары.
Адалдық ұғымы тек мемлекеттік қызметке қатысты емес. Ол адамның күнделікті өмірінен басталады. Өз жұмысын адал атқару, біреудің еңбегін иемденбеу, таныстықпен мәселе шешуге ұмтылмау, заңда белгіленбеген сыйақыны қабылдамау – қоғамдағы адалдық мәдениетін қалыптастыратын қарапайым қағидалар.
Сыбайлас жемқорлықтың алдын алуда азаматтардың белсенділігі де маңызды. Заңсыз әрекетке куә болған жағдайда тиісті тәртіппен хабарлау – қоғамның құқықтық мәдениетін көрсетеді. Мұндай мәселелерді шешудің заңды жолдарын білу азаматтың өз құқығын қорғауына мүмкіндік береді.
Адал қоғам бір күнде қалыптаспайды. Ол әр адамның өз ісіне жауапкершілікпен қарауынан, заңды айналып өтпеуге деген ұстанымынан құралады.
Мемлекет пен халық арасындағы сенім ашықтық пен заңдылыққа сүйенген кезде нығая түседі. Сондықтан сыбайлас жемқорлыққа қарсы мәдениет қалыптастыру – бүгінгі күннің ғана емес, келешек ұрпақ алдындағы жауапкершілік.
Адалдықты талап ету – өзгені бақылаудан бұрын, өзіңнен басталатын ұстаным.
Г.СӘДУАҚАСОВА
